Dr Fasnachtsmäntig - trocke und herrligg!

S'Ainzig wo miehsam gsi isch: dr Stau uff em Cortège. Aber sunnscht hetts gfäggt und mir hän dä erschti Fasnachtstag und Oobe in volle Züüg könne gniesse!

E paar Insider-Gschichtli:
Bim Stau sin mir denn spielend uffs Trottoirrändli gsässe und es sin vieli Föteli e soo vo uns gmacht worde. Es sin no anderi Gschichte passiert: z.B. e Tambourmajor wo uff dr Latärne sitzt, e Drummler wo bim Spiele während em Laufe e neue Marsch leernt (dangge an dr Noteträger 🤩), e Begleitperson wo zum Yyfädler worde isch und e soo dr Stau besitigt hett (dangge 🙏🏼, sage alli wo hinte dra gstande sin, ca. 45 Minute lang!!!), s'duureheebe und drgege halte vo de Junge mit ere grosse Dambuure-Gruppe hintedra (Gratulation!)...

Unser Sujet 2025 lutet:

"Unser Häärz schloot root-blau, seit dr Babbe ze sym Soon - Dr Shaqiri fillt wiider s Stadion"

Abgloffe sin mir das Joohr zämme mit em Stamm vor em Hotel Drey Waggis (oder Drey Keenig, wie me's usserhalb vo dr Fasnacht kennt). So sin mir grad zur Schiffländi füühre kooh und hän gseh, wie dr Ryhsprung durab Kopfladärnli z'wangge kömme. E schöne Ort zum loslaufe, finde mir.
Denn sin mir bis zur Hauptposcht guet duure koh, aber biim Ybiege in d'Falknerstroos hän mir uns e bizz miesse gedulde, will grad einigi Cliquene dur d'Falknerstroos gloffe sind. Aber wyt ischs nümme gsi bis zum erschte Halt, vis-à-vis vom Latini. Nach ere kurze Pause sin mir Junge denn wieder Yygschtande und los zum Cliquekäller gloffe. Mir hän wieder e super z'Morge bekoh (Dangge Jolanda und Thomy; au für die tolle Tischset!). 
Denn hett's nomol gheisse: Ab uff d'Gass. Das isch denn e bizz e lange Riehme gsi, aber schön. Morgestraich isch schliessligg nur einmol im Joor!

Nach dr Pause sin mir denn elay wyyter zooge!

Laider isch dr Morgestraich scho wieder verbyy, aber nach eme feine zMorge mit dr Glygge und ere churze Pause (zem s Goschdym wäggsle...!) gohts wytter...
Stolz geehn mir mit unserem tolle Süschee und vill Gebimmel als Ueli uff d Route. S Wätter isch nit so dr "Börner" - dr Petrus schiint naime anders beschäftigt z sy!

Fir alli Intressierte - unsere Zeedel gits au als gsprocheni Version. Derzue aifach dr QR-Code vom Zeedel scanne - oder do uff dr Link klicke. Vill Vergniege.

Im Fasnachts-Brogramm gsehsch, wo mir underwägs sin...

D Waage- und Reggwisyte-Uusstellig bi dr Kasäärne sin vom Määntig znacht bis am Mittwuch demoorge!

Me planggt jedes Joor uff die scheenschte drey Dääg - und jetz isch es fyr das Joor wieder sowyt. Es goht nur no weenigi Sekunde, mir stöhn alli barat mit dr Larve uff em Kopf und em lüüchtende Kopfladäärnli, d Schleegel und d Piccolo in de Finger - und denn foht dr Dambuurmajor aa: "Morgestraich - vorwärts - Marsch!" - und juscht denne goht s Liecht ab und d Stadt Basel erwacht zum Lääbe.

Es isch Fasnacht!!! Mir dauche-n-yy in d Dunggelhait, wo vo unserer Lambbe, de Kopfladäärnli und em Blitzliechtgwitter (laider!) erlyychtet wärde.

Im Fasnachts-Brogramm gsehsch, wo mir underwägs sin...