Sunntigoobe, mir träffe-n-ys im neye Glyggekäller am Steinegraabe 42 und effne dr Käller fyr d Mitglieder zer Besichtigung. Zwar dominiere no d Faarbe vo unsre Vorgänger (womer am Samschtig e tolle Nomidaag gha hän mit Ständeli und Apéro by ihne), aber gli nach dr Fasnacht feehn d Renovazioonsarbete aa, dass es gli klar erkennbar dr ney Rootsheere-Käller wird.

Vom neye Glyggekäller lauffe mir dernoo zem alte Glyggekäller - pfyffend, wie halt so normaal anere Ladäärnevernisaasch... Aber nit ganz so wie sunsch ame... Statt mit dr Lambbe lauffe mir mit de Stäggeladäärne - aber nach drey lange Joor lauffe mir wieder. Nur no wenig Stunde, denn isch Morgestraich... Mir fraye-n-ys!!!

Es kunnt mir vor, als wärs geschter gse...

Y ha am Frytigmorge mini Fasnachts-Täsche paggt gha mit allne Sache, wo me halt so bruucht während de "drey scheenschte Dääg". Alli Sache, wo uff miner Checklischte gse sin, hany zerscht fyyn süüferli uffem Ässtisch in dr Stuube näbenand aaneg'leggt. Isch au wirglig alles do? Unterwösch - check! Hose, T-Shirts und Schueh - check! Ladekabel vom Handy (muess jo erreichbar sy an dr Fasnacht) - check! Die nötigschte Medikamänt und Pfläschterli - check! Schiint alles do z sy, guet. Und d Goschdym sin au alli do - Zugs-Goschdym, das fyr dr Morgestraich und au das fyr dr Zyschtig und alli Larvene. S Inschtrumänt isch au barat. dr Notfall-Rägeschutz (wony jo sowieso nit bruuch) liggt uffem Tisch, dr Rootsheere-Pin au und au sunscht isch wirglig alles do. Jetz alles in d Täsche pagge und am Nomidaag denn d'Zyt abmache fyr am Samschtig, zum s Fasnachts-Quartier könne z'bezieh und yyrichte. Jetz kha nüt me passiere... gli heissts "Morgestraich, vorwärts, Marsch!".

Hany dänggt gha, säll Mol am 28. Hornig am Morge... Aber am Mittag sinn alli Fasnachts-Träum zerschlaage worde... "Der Regierungsrat hat heute an einer ausserordentlichen Sitzung beschlossen, die Durchführung der organisierten Veranstaltungen im Rahmen der Fasnacht 2020 zu untersagen" hetts inere Medie-Mitdailig vom Regierigsroot gheisse. Vill isch jo gange in dene Dääg vorhär - eso-n-e Virus het sich vo China här sy Wäg bahnt bis zu uns in d Schwiz. Wär hät damals dänggt, dass nit nur d Fasnacht 2020 nit stattfinde wird - und vor allem, dass die ganz Wält mindeschtens zwei Joor lang beherrscht wird vo däm Virus mit all sine Variante, mit de Impfige, de Zertifikat, Masggene (nei, nit d'Larvene)? Mit eme Gsundheitsapparat, wo an Aaschlag kho isch? Mit allne Opfer, wo das Virus g'forderet het?
An sällem Frytignomidaag isch mini Fasnachts-Täsche ämel sehr schnäll wieder usspaggt gse, d Goschdym wieder im Schrangg versorgt und s Inschtrumänt uff d Siite g'leggt.

Und jetz isch's doch wieder sowyt - d Fasnacht wird am 7. Merze am 4i am Morge afoh - und denn heissts 3G - gässle, gässle, gässle! Fyr eimol drei Dääg gässle - s'git kai Cortège und s wärde au kaini Chaisene und Waggis-Wääge zuegloh sy. Aber es wird wieder Fasnacht sy - drey Dääg Ussnahme-Zueschtand nach drey Joor Durscht-Strecki! Fyr mängge Gnirbbs s erschte Mol und ganz vill Binggis, wo syt Joore flyssig g'yebt hän, aber nie hän kenne Fasnacht mache.

Es isch wohr - und au d Rootsheere wärde unterwägs sy. Wo gnau gsehsch do im Fasnachts-Brogramm Stamm. oder im Fasnachts-Brogramm Jungi Garde Mir wurde-n-ys fraie, di uff dr Gass aaz'träffe.