Drummeli II - Derniere

Hüt z‘oobe isch es also sowyt. No eimol die Metall-Stäge duruff. No eimol s‘Goschdym azieh und in dr kiehli Yspiilruum zottle. No eimol bange, ob unsere Major ufem WC verscholle isch. No eimol im Gang vor em Bühneygang d‘Nervosität mit Sprüch überspiile und däne programmverkaufende Waggis Platz mache, wo vom Foyer zrugg kömme und uns bis hüt no kai Waggis-Pass-Bon als Zoll abdruggt hän. Und denn s‘letscht mol uf dr Bühni unseri Pfyffer-Retraite spiile. In Gedanke gseh ich mi scho, hinter dr Bühni stoh, em schöne Rossignol losend die letschte ruhige Momänt gniesse und mir die ganzi Drummeli-Kampagne lo revue passiere.

D‘Rootsheere mache d‘Retraite am Drummeli! Wenn öbber mir vor es paar Joor gsait hätti, dass d’Rootsheere d’Retraite am Drummeli spiile und denn no mit ere Gugge zämme, hätti gseit, är spinnt. Aber unsere ruessende Güggeler und unsere All-in-One-Pfyfferinstrukter hän das möglich gmacht. Wenn ich denn so an dr Ablauf vo unserem Uftritt sälber dängg, merk ich, dass är unser Zämmelääbe mit dr Gugge uf dr i-Dupfe widerspieglet.

Am Drummeli-Weekend sind no d‘Händ verworfe worde und d’Träne sind gflosse, well me gmeint het, dass das nie wird funktioniere. Und denn mit jedere Zuesatzprob het me könne merke, dass es doch öbbis könnt wärde, dass es doch könnt funktioniere, dass es öbbe doch zämme goht. Und denn dr Höhepunkt vo dr Zämmenarbet am Zyschtig. Unser Lokalpolitiker übernimmt d'Pauke damit dr Brueder vom ruessende Güggeler s'Drummeli als Zueschauer ka gniesse. Wie fescht het sich dr Lokalpolitiker do drüber gfreut, und die Freud denn mit eme Tänzli uf dr Bühni usdruggt.

S'Läbe hinter dr Bühni isch wie immer luschtig gsi, well mir so frieh dra gsi sind, hän mir für d'Garderobe oder s’Foyer vill Zyt ka. Villicht fascht zuvill wenn me an d'Nochbildige vo d'Bühneufstellig mit leere Shot-Fläschli dänkt.

Mittlerwyle sind d'Verschnuufer im letschte Värs und ich zieh my Lärvli richtig a und wird uf dr Bühni no es letschts Mol alles gäh. Bis es denn widder imene Joor mit de Vorbereitige fürs näggschte Drummeli los goht, was widder mit vill Ufwand und Lydeschaft verbunde wird sy. Aber Halt! Was dänk ich jetzt scho ans näggschte Drummeli. S'Drummeli isch e Vorfasnachtsverastaltig! Und e Vorfasnachtsverastaltig isch jo eigentlich numme do, zum Vorfreud uf unseri drey schönschte Däg z'steigere! Also liebi Rootsheere und Unikate: ruesse, pfyffe und schränze mir no eimol unseri Retraite und warte denn ungeduldig wie kleini Kinder uf dr Momänt wenns Martinsglöggli 4i schloht und es widder heisst: "Morgestraich, Vorwärts, Marsch!"

Euer Rootsheer