25 Feb2023

Ändstraich

Unglaublig, wie schnäll d Zyt vergoht - grad erscht hetts no Vieri gschlaage am Mäntygmorge, und jetz hetts scho wieder Vieri gschlaage, aber laider am Donnschtygmorge. Die drey scheenschte Dääg sin verby, aber s pfyfft und ruesst no immer in uns drinne und in de Ohre... S Fasnachtsfieber isch immer no do, wird nit vergoh und losst uns uff dr Bummel freye.

Danggscheen Frau Fasnacht, scheen, bisch wieder bi uns gse!

 

Am Frytig, 3. März und Samschtig, 4. März 2023 findet uf em Barfi die 1. Lektion statt. Fasnacht für alli zum Kennelehre und Usprobiere! jetzt-fasnacht.ch (Fr. 13.00 –17.00 Uhr, Sa. 11.00 –16.30 Uhr)

Wotsch bi uns mitmache? Denn kumm doch ans Yyschriibe. Du findsch uns am Samschtig, 11. Merze 2023, vom Zwei bis am Vieri uf em Barfi. Mir freye-n-is uf di!

 

25 Feb2023

Zwaite Daag uff em Cortège 2023

Nach zwei wunderscheene Dääg mit Morgestraich, Cortège und em freye Gässle isch es scho Mittwuch und mir gniesse d Fasnacht in vollem Umfang. S Wätter stimmt, d Lüt am Stroosserand sin fasziniert und mir schwebe in dr Fasnachts-Glückseeligkait. Die kommende Stunde gniesse mir wie wenns grad kurz vorm Morgestraich wär... 

Fir alli Intressierte - unsere Zeedel gits au als gsprocheni Version. Derzue aifach dr QR-Code vom Zeedel scanne - oder do uff dr Link klicke. Vill Vergniege.

Im Fasnachts-Brogramm gsehsch, wo mir underwägs sin...

 

25 Feb2023

Cortège 2023

Nach eme wunderbare Morgestraich und kurzer Pause (zem s Goschdym wäggsle) simmer barat fyr dr Cortège 2023 - ändlig wieder nach 4 Joor e Cortège! Wie hämmer das vermisst. Mir derfe unser Süschee bresentiere, unseri scheene Goschdym und unseri tolli Lambbe (Ladäärne). S Wätter isch uff unsrer Site - är isch halt ebe doch e Basler, dr Petrus!

Fir alli Intressierte - unsere Zeedel gits au als gsprocheni Version. Derzue aifach dr QR-Code vom Zeedel scanne - oder do uff dr Link klicke. Vill Vergniege.

Im Fasnachts-Brogramm gsehsch, wo mir underwägs sin...

D Waage- und Reggwisyte-Uusstellig bi dr Kasäärne sin vom Määntig znacht bis am Mittwuch demoorge!

25 Feb2023

Ladäärne-Vernissaasch 2023

Nach 4 Joor hänn mir ändlig wieder e normali Ladäärne-Vernissaasch... Letscht Joor isch zwar au bi uns d Fasnacht aagseit gse, aber mir hän letscht Joor uff d Lambbe verzichtet gha. Drfür fiire mir das Joor unseri Lambbe umso meh und fraye-n-ys, dass mir se das Joor wieder in unserne Reihe hän und si uns dr Wäg lüchtet...

Das Joor isch aber alles e glai weeneli anders als friehner... Neye Glygge-Käller heisst au neye Yyweihigsblatz, neyi Yypfyff-Route und au neye Yystell-Ort nach em Yypfyffe.

Im Fasnachts-Brogramm gsehsch, wo mir underwägs sin...

25 Feb2023

Morgestraich, vorwärts, Marsch...

Nur no weenig Sekunde, alli stöhn barat mit dr Larve uff em Kopf und em lüüchtende Kopfladäärnli, d Schleegel und d Piccolo in de Finger - do foht dr Dambuurmajor aa: "Morgestraich - vorwärts - Marsch!" - und juscht denne goht s Liecht ab und d Stadt Basel erwacht zum Lääbe.

Es isch Fasnacht!!! Wieder so richtig Fasnacht, mit allem Drum und Dra. Mir laufe mit Ladäärne, wärde am Nomidaag wieder uff em Cortège sy und hänn e Zugs-Goschdym. Nach 4 lange Joor isch d Fasnacht wieder z Basel aacho in vollem Umfang - Frau Fasnacht, mir hänn di vermisst!!!

Im Fasnachts-Brogramm gsehsch, wo mir underwägs sin...

09 Nov2022

Waggislarvenkurs 2022

Ein erneuter erfolgreicher Waggislarvenkurs konnte in unserem neuen Cliquenkeller durchgeführt werden. Sie waren die ersten, welche an unserem neuen Standort Larven kaschiert (1. Samstag) und angemalt (2. Samstag) haben. Dann musste noch am letzten Samstag die Perücke und Waggiskappe montiert haben. Und fertig waren die Prachtstücke (es gab natürlich noch "kleinere" Arbeiten dazwischen, wie Perücke knüpfen, Larve anpassen etc.).

Das Kaschieren ist immer etwas ein "Duureheebe", aber dann beginnt der Spass! Und toll sind sie alle geworden, die Kunststücke! Gratulation! 🎉