Fasnachts-Mittwuch 2019

Starte dien mir dr zweiti Cortège-Daag bi schönschtem Sunneschyyn. Doch das Joor ischs Wätter rächt unberächebar. Erscht kurz uff dr Route foots wieder a rägne. Nichtsdestotrotz zien mir unseri Rundene bi viele Zueschauer duure. D'Sunne kunnt jo denn au bald wieder füüre. 

Als Überraschig wärde die Junge zu mene Apéro im Loge-Clique-Käller yyglaade! Das hänn sie denn gnosse!

Nach em zNacht isch dr Stamm die Junge bi dr Peterskirche go abhoole. Denn hett me gässlet und d'Fasnachtsstimmig gnosse! 

D'Ladäärne isch eimool mehr uff em Seibi verabschiiedet worde und als wyyteri Überraschig sin d'Basler Unikate de Junge no e Ständeli go bringe wo so richtig gfäggt hett! Danke!

Danke do wieder allne, wo die Fasnacht für die Junge möglich gmacht hän (vo dr Sujetobfrau über d'Begleitpersone, Organisatore vo z'Morgeässe und zVieri etc.!)

Und no zum Sujet passend: Dr modisch Schrittzeller vo dr Tochter uss dr Generation Z hett z'Oobe 20'717 Schritt aazeigt. Über die ganzi Fasnacht hett sie so über 60'000 Schritt gmacht! Und my Brueder (zur Erinnerig: Generation Y) hett immer non kai Instagram-Account!