Morgestraich 2019

Gemäss unserem Sujet "X, Y, Z... was kunnt denn jetzt?" hett d'Tochter e xitxit aa (um kai Wärbig z'mache sind die wichtige Buechstabe mit eme "x" ersetzt). Sie ghört zur Generation Z und weiss denn nach em Morgestraich, dass sie 11'843 Schritt gmacht hett. Dodrmit wärs Tagesziel erreicht, d'Uhr zeigt a, gnueg Kalorie für hütt verbrennt!

My dütligg jüngere Brueder, e Aaghörige vo dr Generation Y, hett uns hütt bim z'Morge byychtet, dass er kein Xnstagram het. Dört isch aber ganz aktuell vo unserem Medieverantwortliche e Bild vom Morgestraich uffeglade worde - und ich, e Generation X-Kind, weiss au nüd bessers als nach em Morgestraich d'Websiite z'aktualisiere. Aber das mach ich vor allem für mini Kinder.. :-)

Dr Xhats-App Chat lauft heiss... wo im Internet in dr Präss sin scho Föteli vo unserer Lampe druff? "Guet gsehts uss!" Unsere dasjöhrigi hammer Zeedel bringt genau das uff e Punggt - läset ihn, es ischs drwärt!

De Social Media-Kanääl und dr ganze Technik zum Trotz - am Morgestraich bruuchts nüd söttigs. S'Gfüühl, wenn's Vieri schloot und s'Liecht löscht, dr Major aasait: "Rootsheere, Moorgestraich, Vorwärts, Marsch!" denn lauft eim e Kribble dr Rugge ab - denn wirds eim warm ums Härz! So ischs richtig - so isch Fasnacht!

das isch gsii, kurz bevors Vieri gschlaage hett - Spannig liggt in dr Luft!