Wie jedes Joor goht dr Morgestraich laider vill z schnäll verbyy. Mir hänn aber e feine zMorge mit dr Glygge im Pensiönli gnosse und nach ere churze Pause (zem s Goschdym wäggsle...!) gohts wytter...
Stolz geehn mir mit unserem tolle Süschee zem immaterielle Kulturerb vo dr Menschhait - em Jodle - uff d Route. Unsere Zug gseht super uss - holeduli! S isch Fasnacht!

Fir alli Intressierte - unsere Zeedel gits das Joor inere spezielle Version. Kumm an Cortège, denn kasch en bi uns bikoh.

Im Fasnachts-Brogramm gsehsch, wo mir underwägs sin...

D Waage- und Reggwisyte-Uusstellig bi dr Kasäärne sin vom Määntig znacht bis am Mittwuch demoorge!

Ändlig isch es wieder soywt - es isch Fasnachtszyt! Mir hänn unseri Lambbe-Vernissaasch am Sunntyg, 22. Hornig, ab de Fimfe zoobe, und denn haissts scho gli wieder "Morgestraich - vorwärts - Marsch"! Aber zerscht dien mir unsere Lambbe yypfyffe und fraye-n-ys, dass mir se das Joor wieder in unserne Reihe hän und si uns dr Wäg lüchtet...

Nach em gmietlige Zämme-sy im Glyggekäller gehn mir an Yyweihigsblatz, und dernoo steehn mir scho gli yy zem Lambbe-yypfyffe.

Im Fasnachts-Brogramm gsehsch, wo mir underwägs sin...

Me planggt jedes Joor uff die scheenschte drey Dääg - und jetz isch es fyr das Joor wieder sowyt. Es goht nur no weenigi Sekunde, mir stöhn alli barat mit dr Larve uff em Kopf und em lüüchtende Kopfladäärnli, d Schleegel und d Piccolo in de Finger - und denn foht dr Dambuurmajor aa: "Morgestraich - vorwärts - Marsch!" - und juscht denne goht s Liecht ab und d Stadt Basel erwacht zum Lääbe.

Es isch Fasnacht!!! Mir dauche-n-yy in d Dunggelhait, wo vo unserer Lambbe, de Kopfladäärnli und em Blitzliechtgwitter (laider!) erlyychtet wärde.

Im Fasnachts-Brogramm gsehsch, wo mir underwägs sin...

Jetzt sitz ich am Sunntig bym z'Morge do elai am Tisch. S’isch halt scho gar frieh für e Sunntig, ka jetzt drfür aber eifach myni Gedanke schweife loh. Ich muess unweigerlich an myni Arbetskollege dänke, wo dr Jänner und dr Hornig generell nit so gärn hän und es faszinierend finde, dass ich au däne beide Mönet so vill positivs ka abgwünne. Dass si s’mit däne beide Mönet e bitzeli schwer hän, ka ich aber verstoh. Wär ich ohni s'Fasnachtsgen uf d'Wält ko, würds mir vermuetlich glych go. Aber jetzt sitz ich do am Tisch und bi voller Vorfreud uff d'Fasnacht. Das Joor villicht no e bitzeli meeh als anderi Johr. Das het vermuetlich au mit däm gheime Projäkt z'tue, wo mir zu zweit ufgleist hän und nur ganz wenigi in dr Clique öbbis wüsse drvo. So Arbetsöbe könne halt scho Kreativität uslöse. Und e bitzeli kreativ sin mir denn au gsi. Ich hoff es lauft alles wie plant und es isch pünktligg fertig. Ich bi jo so gspannt uff d'Reaktion vo dr Clique und freu mi aber au wie e glaine Bueb. Aber verzelle was es isch, das tue n’ich do jetzt au nit. Ich will eigentlich numme d'Lüt neugierig mache. Drmit alli e bitz e Fasnachts-Vorfreud könne ha.

Aber jetzt mergg ich, dass ich doch scho e weneli z'lang in minere Gedanggewält versunke bi. Ich muess mi also schleunigscht uff dr Wäg mache damit ich rächtzytig an dr Marschiebig bi. Oh Mischt! Wie foht s'Ohremyggeli widder aah?

Eure Rootsheer